MMDA nakipagpulong sa DPWH at SMC para sa Oplan Kontra Baha

Nakipagpulong si Metropolitan Manila Development Authority (MMDA) General Manager Nicolas Torre III sa mga kinatawan ng Department of Public Works and Highways (DPWH) at San Miguel Corporation (SMC) bilang bahagi ng patuloy na pagsasagawa ng Oplan Kontra Baha.

Ito ay alinsunod sa direktiba ni MMDA Chairman Atty. Don Artes na palakasin ang koordinasyon ng MMDA sa iba pang ahensiya ng pamahalaan at mga pribadong sektor upang masolusyunan ang problema sa baha. Tinalakay ang kasalukuyang sitwasyon ng mga flood-prone areas at ang mga agarang hakbang na kailangang isagawa upang mabawasan ang epekto ng pagbaha.

Binigyang-diin ni Torre ang kahalagahan ng maayos na flood management, kabilang ang paglilinis at pagpapalawak ng mga estero, ilog, at drainage system pati ang mas mahigpit na pagpapatupad ng mga polisiya laban sa illegal structures at improper waste disposal.

Inilahad ng DPWH ang status ng mga kasalukuyang flood control at drainage projects na nakatuon sa pagbabawas ng antas ng baha sa mga pangunahing kalsada at komunidad. Kabilang dito ang pagpapalawak ng drainage capacity, pagtatayo at rehabilitasyon ng pumping stations, at road elevation projects na makatutulong upang mas mabilis na bumaba ang baha at maiwasan ang matagal na pagbabara ng tubig.

Sa panig ng SMC, iprinisinta nila ang kanilang mga inisyatiba at suporta sa flood mitigation, kabilang ang malawakang declogging, desilting, at cleanup operations sa mga pangunahing daluyan ng tubig. (Bhelle Gamboa)