Higit 200 sakay ng nagkaproblemang barko sa Basilan nailigtas ng PCG

Isang barko na may lulang higit dalawangdaang pasahero at labinglimang crew ang nakaranas ng problema habang naglalayag sa katubigan ng Pangasahan Island, Basilan.

Habang nagsasagawa ng Search and Rescue operations sa lumubog na MV Trisha Kerstin 3 sa Baluk-Baluk Island, nakatanggap ng report ang Philippine Coast Guard na may isang barko ang nasira at delikadong sumadsad sa baybayin.

Agad rumesponde ang mga tauhan ng PCG sakay ng BRP Tubbataha sa kinaroroonan ng ML AS Express 2 na galing Banguingui, Sulu at patungo ng Zamboanga City.

Dinala sa mas ligtas na lugar ang barko at saka inilikas ang mga pasahero into.

Hinatak din ng BRP Tubbataha ang barko patungo ng Zamboanga City. (Dona Dominguez-Cargullo)