Viral drift video sa Tuguegarao City na inisyuhan ng show cause ng LTO, AI lang pala

Usap-usapan ngayon ang nag-viral na pagdi-drift umano ng isang motorista sa rotonda sa Tuguegarao City, Cagayan.

Dahil sa nasabing viral video, nag isyu ng show cause order and LTO laban sa driver ng sangkot na kotse na isa ring content creator.

Pero ayon sa mga netizen sa lungsod, ang naturang video ay isa palang AI generated.

Ayon kasi sa mga residente kung titignang mabuti ang video na pinalitaw na kuha ng drone, hindi makikita ang maraming establisyimento na nakapaligid sa rotonda gaya na lamang ng isang malaking supermarket.

Ayon naman kay Tuguegarao City Councilor Mark Angelo Dayag, ang kahalintulad na video na mukhang makatotohanan at walang malinaw na label na “AI-generated” o “edited,” ay maaaring makapanlinlang ng publiko.

Aniya ang ganitong uri ng content ay may potensyal na magdulot ng takot o panic, magbigay ng maling impormasyon kaugnay ng public safety o traffic violations, at makasira sa reputasyon ng lungsod at sa tiwala ng publiko sa mga otoridad. (Dona Dominguez-Cargullo)