Travel Agency sa Cavite ipinasara ng DMW; sangkot sa illegal recruitment

Nagkasa ng operasyon ang Department of Migrant Workers at ang CIDG laban sa isang travel agency sa Cavite na ilegal na nag-aalok ng trabaho patungong South Korea.

Dinakip sa operasyon si Marianeto Camposano Raro matapos makumpirma na ang pinapatakbo niyang travel agency na R and T Travel and Tours ay sangkot sa illegal recruitment.

Sa bisa ng Closure Order, ipinag-utos ng DMW ang pagpapasara sa nasabing kumpanya na napag-alamang nag-aalok ng trabaho sa mga aplikante para sa South Korea bilang hotel cleaner at laundry shop worker gamit ang G1 visa na karaniwang ibinibigay sa mga refugees o asylum seekers.

Ang mga aplikante ay pinapangakuan ng 85,000 hanggang 125,000 pesos na sweldo pero sinisingil sila ng 80,000 pesos na processing fee.

Ayon sa DMW, bilang isang travel agency, ang naturang kumpanya ay hindi maaring magsagawa ng kahit anong recruitment activities. (DDC)