2 health centers sa Las Piñas City pinasinayaan
Mas pinapalakas pa ang serbisyong pangkalusugan para sa mga residente sa Las Piñas City sa pamamagitan ng inagurasyon ng CAA-Lanzones Health Center na matatagpuan sa Lanzones cor. Saging Street, Barangay CAA/BF International at ang bagong renovated na Health Center ng Brgy. Elias Aldana.
Pinangunahan nina Mayor April Aguilar at Vice Mayor Mel Aguilar ang pagpapasinaya sa dalawang health centers.
Ang bagong CAA-Lanzones Health Center ay mayroong kabuuang sukat na 293.04 square meters na dinisenyo upang magbigay ng kumpleto, maayos, at accessible na serbisyong medikal para sa mga residente ng barangay at mga karatig-lugar.
Sa ground floor, matatagpuan ang reception area, PWD toilet, doctors or consultation room, minor surgical room, at TB DOTS facility. Sa ikalawang palapag naman ay may dental room, staff room, counseling room, at supplies storage room. May sarili rin itong water tank sa roof deck upang masiguro ang tuloy-tuloy na operasyon ng pasilidad.
Ang CAA-Lanzones Health Center ay inaasahang magbibigay ng mas mabilis at mas komportableng access sa primary health care, mula konsultasyon hanggang basic medical at dental services, bilang bahagi ng patuloy na pagpapalakas ng serbisyong pangkalusugan sa Las Piñas.
Samantala pormal nang binuksan ang na-repair at na-rehabilitate na Elias Aldana Health Center bilang bahagi ng patuloy na pagsasaayos at pagpapahusay ng mga health facilities sa lungsod.
Ang naturang health center ay may total floor area na 204.96 square meters at inayos upang mas maging functional, ligtas, at komportable para sa mga pasyente at health workers.
Matatagpuan sa ground floor ang reception area, PWD toilet, consultation room, family room, pre-natal area, minor surgical room, staff toilet, at nurse room habang sa ikalawang palapag nanan ang dental room, laboratory, medicine room, TB DOTS facility, patients’ toilet, at storage room.
Sa pamamagitan ng rehabilitasyon ng naturang health center ay mas napalawak nito ang kakayahan ng pasilidad na maghatid ng serbisyong medikal tulad ng maternal care, laboratory services, dental care, at TB treatment para sa mga residente ng Barangay Elias Aldana.
Patuloy ang Pamahalaang Lungsod sa pagpapabuti ng health infrastructure upang masigurong ang bawat Las Piñero ay may access sa maayos, abot-kaya, at dekalidad na serbisyong pangkalusugan. (Bhelle Gamboa)
