Lahat ng sanitary landfill sa bansa pinaiinspeksyon ng DENR

Iniutos ni Environment Secretary Raphael Lotilla ang agarang inspeksyon sa lahat ng operational na sanitary landfills sa bansa kasunod ng pagguho sa Binaliw Landfill sa Cebu City na ikinasawi ng tatlumpu’t anim na katao.

Ayon sa pahayag ng DENR, inatasan ang lahat ng regional offices na tiyaking ang mga landfill sa kani-kanilang nasasakupan ay nakasusunod sa environmental compliance certificates at safety protocols.

Partikular na pinatutukoy ni Lotilla kung mayroong potensyal na hazards ang mga landfill at kung makikitaan ay dapat agad magpatupad ng corrective measures bago pa man mauwi sa trahedya.

Sa datos ng DENR noong 2025, mahigit three hundred seventy sanitary landfills ang operational sa bansa.

Maliban sa nationwide inspection sa mga landfill ay ipinasasailalim din ni Lotilla sa assessment ang umiiral na solid waste management sa Pilipinas. (DDC)