29 timbog sa sinalakay na jueteng hub sa Albay

Naaresto ang dalawampu’t siyam na katao sa sinalakay na hinihinalang jueteng hub sa bayan ng Daraga sa Albay.

Sa ikinasang operasyon ng pulisya nadatnan ang mga suspek na tumataya at nagpupustahan.

Ayon sa Albay Police Provincial Office, nakumpiska sa sinalakay na lugar ang mga booklet at kopya ng half-size newsprint na may printing Code 128, Collection Report Forms na may nakasulat na mga kumbinasyon ng numero at kaukulang taya.

May mga nakuha ding iba pang gamit gaya ng electric tambiolo na may lamang mga bolang may numero at ang perang ginamit pang-taya na umaabot sa 240,000 pesos.

Hawak ng Daraga PNP ang mga suspek na mahaharap sa kasong paglabag sa Republic Act Number 9287 o Illegal Numbers Game Law. (Dona Dominguez-Cargullo)