Fixed-wing aircraft tumutulong na sa paghahanap sa nawawalang MCBA Amejara

Nagpadala na ang Philippine Coast Guard ng fixed-wing aircraft para tumulong sa search and rescue operations sa nawawalang motorbanca na MBCA Amejara.

Idineploy ng Coast Guard District Southeastern Mindanao ang Islander 251 bilang suporta sa nagpapatuloy na operasyon.

Ayon sa PCG, malaking tulong ang Islander 251 sa mga search operations sa lupa at karagatan.

Ang twin engine configuration nito ay idinesenyo para sa mas pangmatagalang over-water missions, habang ang high-wing design nito ay kritikal para sa pag-detect ng survivors, debris, o mga distress na barko.

Sa labinglimang sakay ng motorbanca, isa lamang ang nakaligtas habang hinahanap ang labingapat na iba pa.

Ayon sa nag-iisang survivor, tumaob ang bangka madaling araw noong January 19 sa Davao Gulf. (Dona Dominguez-Cargullo)