Pagsusuot ng helmet at mask sa mga establisimiyento at pampublikong lugar sa Parañaque City ipinagbawal
Pinagtibay at inaprubahan ng Sangguniang Panlungsod ng Parañaque ang ordinansang nagbabawal sa pagsusuot ng motorcycle helmets, masks, at iba pang face-concealing headgear sa loob ng mga establisimiyento at sa mga pampublikong lugar kung ang isang tao ay hindi na aktibong nakasaky sa motorsiklo.
Aprubado ng 10th Council ang City Ordinance No. 2025-30 (69), Series of 2025 na mas kilala sa tawag na “Anti-Face Concealment Ordinance of Parañaque City.”
Ang ordinansa ay sinulat ni Councilor Pablo A. Olivarez II at nilagdaan ni Mayor Edwin L. Olivarez noong November 13, 2025 na naglalayong pagandahin ang kaligtasan ng publiko at maiwasan ang maaaring mangyayaring krimen kasunod ng mga report na ang mga suspek ay gumagamit ng motorcycle helmets at iba pang pantakip sa mukha upang itago ang kanilang pagkakakilanlan sa panahon ng robberies, assaults, at iba pang kriminal na gawain.
Sa ilalim ng ordinansa, labag sa batas ang pagsusuot ng mga helmet, bonnet, ski mask, balaclavas, full-tint face shield, construction helmet, industrial mask, o katulad na face-concealing items sa loob ng commercial, government, educational, financial, at iba pang establisimiyento na bukas para sa publiko.
Saklaw ng ban ang mga indibiduwal na nakalayo sa kanilang mga motorsiklo kasama na rito ang mga bumaba na at sa distansiyang tatlong metro mula sa pinaghintuan o pinaradahang lugar gaya ng mga kalsada, bangketa, eskinita, parking areas, palengke, parke, at designated crime-prone zones.
“Refusal to remove face-concealing headgear upon lawful request by police officers, barangay officials, or security personnel is likewise prohibited.
Exemptions are provided for medical or health-related use during officially declared public health emergencies, recognized religious or cultural practices, and motorcyclists who are in actual transit on public roads and highways,” nakasaad sa ordinansa.
Samantala inatasan namang magpatupad ng ordinansa ang
Parañaque City Police, barangay tanods, at Traffic and Parking Management Office.
Ayon pa sa ordinansa inoobliga ang mga establishments, residential subdivisions, at barangays na magpaskil ng visible notices na magpapabatid sa publiko kaugnay ng pagbabawal.
Binigyang direktiba rin ang mga opisyal ng barangay na umasiste sa information campaigns at makipag-ugnayan sa pulisya sa pagmomonitor ng mga lugar na may mataas ang insidente ng krimen.
Pagmumultahin ang mga lalabag ng P1,500 at written warning para sa first offense; P3,000 and/or community service ng hindi bababa sa walong oras para sa second offense; at P5,000 at posibleng pagkakakulong ng hanggang 15 na araw base sa magiging pasya ng korte para sa paulit-ulit na paglabag.
Habang ang mga paglabag na nagawa na may kinalaman sa iba pang krimen ay may karampatang karagdagang penalties sa ilalim ng umiiral na Revised Penal Code o special penal laws.
Kabilang sa sponsors ng “Anti-Face Concealment Ordinance of Parañaque City” sina Councilors Daniel Eric M. Baes, Jose Enrico T. Golez, Allen Ford L. Tan, John Ryan G. Yllana, Viktor Eriko M. Sotto, Jerome Bart M. Frias, Martiess B. de Asis, Shiella G. Benzon, Shannon Mae M. Olivarez-Bernardo, Carina S. Gabriel, Vincent Kenneth M. Favis, Brillante V. Inciong, Raquel Gabriel-Velasco, Liga ng mga Barangay President Noel Japlos, at Sangguniang Kabataan President Denize Kathlyne S. Park. (Bhelle Gamboa)
