Las Piñas delegates na stranded sa Sinulog Festival sa Cebu agad tinulungan ni Mayor Aguilar
Agad na tumulong si Mayor April Aguilar at ipinagmalasakit ang kapakanan at kaligtasan ng mga napaulat na stranded na delegado ng Las Piñas City na sumali sa nakalipas na Sinulog Festival sa Cebu.
Nagpalabas din ng opisyal na pahayag ang Office of the City Mayor upang klaruhin ang tunay na pangyayari sa nagviral na grupo mula sa Las Piñas City na sumali sa nasabing kapistahan.
Nilinaw ng alkalde na ang grupong nagtungo sa Cebu at lumahok sa Sinulog Festival ay mga private individuals na sumali sa aktibidad sa pamamagitan ng isang private contractor.
“Nais din naming idiin na walang kaalaman si Mayor April Aguilar ukol sa anumang financial subsidy na ibinigay sa organizer, kabilang ang iniulat na P1.5 milyon na suporta mula sa Sinulog Foundation. Ang naturang pondong ito ay hindi dumaan sa Pamahalaang Lungsod ng Las Piñas,” nakasaad sa kalatas.
Nang makarating sa lokal na pamahalaan ang impormasyon na may ilang kabataang Las Piñero na nahirapan makauwi, agad na kumilos si Mayor April Aguilar at inako ng alkalde gamit ang kanyang personal na pondo ang gastos sa pag-uwi ng kabuuang 111 indibidwal, kabilang ang pamasahe at iba pang kaugnay na pangangailangan.
Ayon pa sa opisina ni Mayor Agyilar, nakapagproseso na rin ng mga airline ticket para sa pagbabalik ng mga naturang indibiduwal at pauuwiin sila sa lalong madaling panahon. Habang hinihintay ang kanilang pag-uwi, patuloy silang inaalagaan, kabilang ang pagbibigay ng maayos na pagkain upang matiyak ang kanilang kaligtasan at kapakanan hanggang sa makabalik sa Las Piñas.
Ang agarang aksyon na ito ay isinagawa sa pakikipag-ugnayan at koordinasyon ng Barangay Pilar, sa pamumuno ni Punong Barangay Ronillo Fuentes, upang masiguro ang maayos at ligtas na pagbabalik ng mga kabataang Las Piñero sa lungsod. Kaagad ding inatasan ni Mayor Aguilar ang mga kaukulang tanggapan ng lungsod, kabilang ang City Tourism and Cultural Office upang ibigay ang buong suporta at tulong sa pagproseso ng kanilang mga ticket at sa koordinasyon sa airline.
Inihayag pa ng pinong lungsod na ang kanyang pagtuling ay hindi dahil sa obligasyon kundi dahil sa malasakit.Malinaw ang kanyang paninindigan na walang Las Piñerong dapat mapabayaan, lalo na kung ang usapin ay kaligtasan at kapakanan ng kabataan.
Patuloy na naninindigan ang Pamahalaang Lungsod ng Las Piñas sa katotohanan, transparency, at responsableng pamumuno, at hinihikayat ang publiko na maging maingat sa pagbabahagi ng hindi kumpleto o maling impormasyon na maaaring magdulot ng kalituhan at hindi kinakailangang tensyon. Ang Pamahalaang Lungsod ay laging handang tumulong, ngunit patuloy ring paalala na ang mga opisyal na delegasyon, pondo, at aktibidad ng lungsod ay dumaraan sa tamang proseso, malinaw na koordinasyon, at opisyal na pahintulot.
Para sa lahat ng Las Piñero, malinaw ang mensahe ni Mayor April Aguilar: ang suporta ng Pamahalaang Lungsod ay nananatili sa oras ng pangangailangan, nang may malasakit, pananagutan, at integridad. (Bhelle Gamboa)
