Body-worn camera gagamitin na ng BFP sa Fire Safety Inspections

Ipinatupad na ng Bureau of Fire Protection ang mandatory na paggamit ng Body-Worn Cameras kapag nagsasagawa sila ng fire safety inspections.

Base sa kautusan ng Department of the Interior and Local Government kailangang suot ang mga camera at recorded ang buong proseso – mula sa pag-alis sa fire station, pagbiyahe, actual inspection, pagtalakay sa findings, at hanggang sa maibalik ang camera sa station custodian.

Ang kabiguang i-rekord ang proseso o kung makikitaan ng tampering at iba pa ay ituturing na ‘misconduct’ sa panig ng personnel.

Sa pagsasauli ng camera, dapat ilahad ng Fire Safety Enforcer ang pangalan, ranggo, lokasyon, petsa at oras, nature ng inspeksyon at ang pangalan ng establisyimento.

Ang may-ari ng establisyimento ay maaari ding mag-request ng kopya ng inspection video sa loob ng seven working days. (DDC)