17 istasyon ng EDSA Busway may Wi-Fi na
Inilunsad ng Department of Transportation at Department of Information and Communications Technology ang libreng internet access sa lahat ng labingpitong istasyon ng EDSA Busway sa ilalim ng Free Wi-Fi for All Program ng pamahalaan.
Ayon kay Transportation Secretary Giovanni Lopez, maituturing nang basic necessity ngayon ang internet connection kaya malaking tulong sa mga pasahero ng EDSA Busway ang pagkakaroon ng libreng wi-fi sa mga istasyon.
Makatutulong din aniya ito sa paggamit ng mga pasahero sa cashless payment sa EDSA Busway dahil hindi na nila magiging problema ang koneksyon kapag gagamit sila ng QR Code o e-wallets sa pagbabayad ng pamasahe.
Ayon kay DICT Secretary Henry Aguda, palalawigin pa sa iba pang transportation sector ang free wi-fi program at target na malagyan din ng internet service ang loob ng mga tren, Express o Skip Bus, at ang mga pantalan.
Sa ngayon sinabi ng DOTr at DICT na nakapag-install na ng libreng internet services sa EDSA Busway Balintawak, Kaingin, Fernando Poe Jr., North Avenue, PhilAm, Quezon Avenue, Kamuning, Nepa Q-Mart, Main Avenue, Buendia, Tramo, Taft Avenue, Roxas Boulevard, Ayala, SM North EDSA, SM Megamall, at SM Mall of Asia Stations.
Sunod ding lalagyan ng libreng wi-fi ang EDSA Busway stations sa Monumento, Bagong Barrio, at Guadalupe, gayundin ang mga bagong bubuksang istasyon na Cubao, Magallanes at PITX. (DDC)
