Mga opisyal ng MMDA at Meralco nagpulong

Nakipag-ugnayan si Metropolitan Manila Development Authority (MMDA) General Manager USec. Nicolas D. Torre III sa mga opisyal ng Meralco para talakayin ang mga posibleng maging areas of cooperation sa pagitan nito at ng ahensiya.

Idinulog din ang concerns ng MMDA sa nasabing electricity distributor gaya ng mga dangling/idle wires na nagiging sanhi ng aksidente, depektibong streetlights, at mga insidente ng nakawan ng kable.

Sa panig naman ng pagtulong ng ahensiya sa Meralco, sinabi ni USec. Torre na maaaring itawag ng mga ito ang kanilang concerns sa Hotline 136 ng ahensiya.

Ipinakita rin ni Torre sa mga opisyal ng Meralco ang Communications and Command Center o Metrobase kung saan namomonitor ang nasa higit 500 na CCTV cameras na nakakalat sa mga pangunahing kalsada sa Metro Manila.

Nagpasalamat din si Torre sa iba pang tulong, responde, at suporta ng Meralco sa mga programang ipinatutupad ng ahensiya.

Nangako naman ng agarang tulong ang Meralco sa mga ipinagbigay-alam sa kanilang mga concerns sa naging pagpupulong. (Bhelle Gamboa)