12 kilo ng shabu nasabat sa Pasay HVI arestado

Tinatayang 12 na kilo ng hinihinalang shabu na nagkakahalaga P81.6 million ang nakumpiska ng mga operatiba ng Pasay City Police Station mula umano sa isang bagong natukoy na High-Value Individual (HVI) sa gitna ng intelligence-driven operation sa Seaside Boulevard, Barangay 76 sa nasabing lungsod nitong Martes ng gabi.

Dakong alas-11:00 ng gabi ng January 13, 2026, agad inaksiyunan ng mga tauhan ng Sub-Station 10 (MOA) sa superbisyon ni Col Joselito De Sesto, Chief of Police ng Pasay CPS, ang kanilang natanggap na impormasyon mula sa PDEG-SOU 3 galing naman sa confidential informant nito kaugnay ng isang babae na magdedeliver ng ilegal na droga sa naturang lugar na tumugma naman sa ibinigay niyang diskripsiyon.

Nakumpiska ng otoridad mula sa suspek na si alyas “Farhanie,” 26-anyos, ang dalawang eco-bags na naglalaman ng umano’y shabu na nagresulta ng kanyang agarang pagkaaresto.

Ang hinihinalang droga ay tinurn-over sa Southern Police District Forensic Unit upang suriin hbang inihahanda ng otoridad ang pagsasampa ng kasong paglabag sa Comprehensive Dangerous Drugs Act of 2002 laban sa suspek sa Pasay City Prosecutor’s Office.

Samantala pinuri ni SPD District Director BGen Randy Y. Arceo ang tagumpay ng operasyon na isinagawa ng operating unit para sa kanilang wastong pagpapatupad ng batas at implementasyon ng pag-aresto. (Bhelle Gamboa)