Vendors ng Wowee Public Market nagprotesta sa harap ng Pasay City Hall

Nagsagawa ng kilos protesta ang mga kasapi ng Wowee Public Market Vendors Association sa harapan ng Pasay City Hall kung saan inokupahan ang linya ng kalsada sa F.B Harrison Street.

Hinihiling ng vendors kay Mayor Emi Calixto-Rubiano na buksan na ang ipinasarang palengke noon pang Disyembre 19, 2025 para maituloy na ang kanilang operasyon sa pagtitinda.

Ipinasara ng alkalde ang naturang palengke dahil sa umano’y kawalan ng kaukulang permit.

Nais ng asosasyon na ikonsidera ni Mayor Rubiano ang kanilang kahilingan dahil wala naman umanong nangyaring wastong notice at konsultasyon sa mga kasaping vendors na ikinagulat nila ang biglang pagsasara ng palengke kung saan natigil ang kanilang hanapbuhay bago ang kapaskuhan.

Binigyang-diin ng vendors association ang marangal nilang trabaho at karamihan sa kanilang mga anak ay nakapagtapos dahil sa kanilang pagtitinda.

Mabilis namang naharang ng mga operatiba ng Pasay City Police ang mga lumusob na vendors sa city hall.

Sinasabing walang kaukulang permiso mula sa lokal na pamahalaan ang pagsasagawa ng kilos protesta ng mga vendor.

Nagdulot naman ng bahagyang abala sa mga motorista at commuters ang kilos protesta dahil sa pagkakaokupa ng mga vendor sa kalsada. (Bhelle Gamboa)