17 kalaboso sa higit kalahating milyong halaga ng nakaw na telecom cables sa Las Pinas City
Kalaboso ang sinapit ng 17 na lalaki matapos nahuli umano sa aktong nagnanakaw ng underground telecom cables na nagkakahalaga ng P556,929.72 sa Barangay Talon Uno, Las Piñas City.
Kinilala ni Las Piñas City Police Station (CPS) Chief Col Sandro Jay Tafalla ang mga naarestong suspek na sina alyas “John,” “Patrick,” “Joshua,” “Johnrey,” “Dennis,” “Dupper,” “Bamber,” “Rommel,” “Rafael,” “Arman,” “Ryan,” “Jhon,” “Ariel,” “Peter,” “Rolando,” “Kian,” at “Jeffrey”.
Pormal na naghain ng reklamong paglabag sa Republic Act 10515 (Anti-Cable Television and Cable Internet Tapping Act) at Theft si alyas “Vicente”, Senior Asset Protection Specialist ng isang telecommunications company laban sa mga suspek.
Ayon sa report, naaktuhan umano ng mga operatiba ang mga suspek na ikinakarga sa Isuzu closed van CPP 9773 ang tinatayang 150 metro ng kable.
Unang ipinabatid sa otoridad ng isang guwardiya ng telecommunications provider ang namataan nitong grupo ng lalaki na humihila ng mga kable sa ilalim ng kalsada habang nakaparada ang isang closed van.
Nakumpiska sa mga suspek ang mga kable, bolt cutter, tatlong improvised steel hooks, at closed van. (Bhelle Gamboa)
