PCG member kalaboso sa pandadakma ng puwet ng waitress sa Pasay City

Kalaboso ang inabot ng isang miyembro ng Philippine Coast Guard (PCG) matapos umanong fakmain ang puwet ng isang waitress ng restobar sa Pasay City ngayong Lunes ng madaling araw.

Agad inaresto ng otoridad ang suspek na si alyas “Darvin”, 30-anyos, dahil sa sa paglabag sa Republic Act 11313 (Safe Spaces Act).

Sa pagsisiyasat ng Pasay City Police Station, dakong ala -1:10 ng madaling araw ng Enero 5, nang maganap ang insidente sa loob ng Padis Point Restobar, EDSA, Barangay 147, Zone 16, sa Pasay City.

Dinakip ang suspek ng bouncer na si alyas “Mervyn” at kaagad na tinurn-over sa otoridad.

Ayon sa reklamo ng biktimang si alyas “Rysette”, nagsisilbi siya ng mga order sa loob ng restobar nang biglang hawakan sa puwet ng dumaang suspek bago dumiretso sa comfort room.

Kinumpronta ng biktima ang suspek paglabas nito ng palikuran.

Inihahanda na ng Women and Children Protection Desk ng Pasay CPS ang isasampang reklamo laban sa suspek sa piskalya ng lungsod. (Bhelle Gamboa)