Salary increase, retirement benefits ng government employees buo pa rin sa inaprubahang 2026 budget

Walang tinanggal at walang maaantala.

Ito ang tiniyak ng Department of Budget and Management kasunod ng pahayag ng ilang mambababatas na maaapektuhan ang salary increases at retirement benefits ng mga guro, kawani ng gobyerno, at uniformed personnel batay sa inaprubahang 2026 National Budget.

Ayon sa DBM, hindi ito totoo dahil ang sinasabing 24 billion pesos ay hindi binawasan o kinansela.

Sa halip ay inilipat lamang ito sa tamang ahensya para mas diretso at mas mabilis ang pagpapalabas ng benepisyo, lalo na para sa subsistence allowance ng uniformed personnel.

Tiniyak din ng DBM na buong-buo ang pondong inilaan para sa sahod at salary increases ng civilian employees at uniformed personnel at nasa budget ito ng kani-kanilang ahensya.

Mananatili ding buo ang pensyon ng mga uniformed personnel habang ang mga bagong magreretiro sa ilalim ng optional retirement ay dadaan pa rin sa umiiral na proseso.

Ipinaliwanag ng DBM na inayos lamang ang paglalagay ng pondo para mas maayos na implementasyon nito. (DDC)