Screen time ng mga bata dapat bantayan ng magulang ngayong bakasyon – DOH

Pinababantayan ng Department of Health sa mga magulang ang kanilang mga anak sa sobra-sobrang oras sa paggamit ng cellphone at gadgets.

Ayon sa DOH, ngayong Christmas vacation at walang pasok sa eskwela ang mga bata, mas marami ang kanilang oras sa paglalaro ng gadgets at iba pang online activities.

Sa datos ng DOH, lima sa bawat sampung bata ang may sariling cellphone at may access sa internet.

Marami sa kanila ay umaabot sa mahigit tatlumpu’t apat na oras kada linggo ang paggamit ng digital screens para sa entertainment.

Paalala ng DOH sa mga magulang dapat na bantayan ang aktibidad ng mga bata online.

Sa ganitong panahon kasi ay tumataas din ang panganib ng cyberbullying, online predators, at exposure sa delikadong online content. (DDC)