Reenacted budget posible ayon sa Palasyo

Bubusisiing mabuti ni Pangulong Ferdinand Marcos Jr. ang nalagdaang 6.793-trillion peso na 2026 General Appropriations Bill ng Bicam.

Duda si Palace Press Officer Usec. Claire Castro na kakayanin sa loob ng natitirang dalawang araw na lamang ngayong taon ang pagbusisi at pag-aaral sa panukalang budget.

Ayon kay Castro, sa sandaling matanggap na ng Malakanyang ang inaprubahang reconciled budget, aabutin ng isang linggo para aralin ito kaya mukhang kapos talaga ang panahon.

Dahil dito, hindi isinasantabi ng Malakanyang ang posibilidad na magkaroon ng reenacted budget.

Paliwanag ni Castro, kung December 29 darating sa Palasyo ang niratipikahang panukalang budget, kulang ang natitirang dalawang araw para mabusisi ito ng husto. (DDC)