2 drug suspect arestado sa Muntinlupa City, halos P200K na halaga ng shabu nasamsam

Nagsagawa ng operasyon ang mga operatiba ng Station Drug Enforcement Unit (SDEU) ng Muntinlupa City Police Station na nagresulta ng pagkaaresto ng dalawang suspek at nakumpiska ang P192,168.00 na halaga ng umano’y shabu sa Barangay Alabang sa lungsod.

Nasa kustodiya ng pulisya ang mga suspek na sina alyas “Joms”, 42-anyos, at alyas “Kulet”, 45-anyos, matapos nadakip sa paglabag sa Comprehensive Dangerous Drugs Act of 2002.

Sa gitna ng operasyon nakumpiska ng otoridad sa dalawang suspek ang tinatayang 28.26 na gramo ng hinihinalang shabu at buy-bust money.

Ang matagumpay na operasyon ay sumasalamin sa tuloy-tuloy na pangako ng Southern Police District sa ilalim ng liderato ni District Director, BGen Randy Y. Arceo , na maigting na kampanya kontra ilegal na droga bilang suporta sa anti-illegal drug efforts ng gobyerno. (Bhelle Gamboa)