Mga empleyadong ayaw sumayaw sa Christmas Party hindi pwedeng patawan ng parusa

Pinaalalahanan ng Department of Labor and Employment o DOLE ang mga kumpanya na magdaos ng Christmas Party o year End Party nang may pagrespeto sa kultura, relihiyon at personal na kagustuhan ng kanilang mga empleyado.

Ginawa ng DOLE ang pahayag kasunod ng mainit na usapin o debate sa social media kung pwede bang piloting sumayaw o mag-perform ang empleyado para sa Christmas Party presentation.

Nilinaw ng National Labor Relations Commission o NLRC na pwedeng maghain ng reklamo ang mga empleyado kung sila ay pinilit o kaya ay pinagbantaan na mahaharap sa parusa kapag tumanggi silang sumayaw o mag-perform.

Sinabi ng NLRC na may valid na rason dapat ang pagpapataw ng disciplinary action laban sa empleyado kabilang ang misconduct, gross negligence, loss of confidence, grave threat laban sa employer at kaniyang pamilya at iba pang kahalintulad nito na may kaugnayan sa trabaho.

Kung pinilit o binantaan ng parusa dahil sa hindi pagsayaw, pwedeng humingi ng tulong sa NLRC ang empleyado.

Pero dahil Holiday Season naman at kung wala namang pamimilit at pagbabanta, hinikayat ng NLRC ang mga manggagawa na makisaya at makiisa sa pagdiriwang ng kanilang kumpanya para maging “Merry” ang lahat ngayong Christmas. (DDC)