Publiko pinaiiwas sa bad habits kapag holiday season

Sa nalalapit na selebrasyon ng Pasko at Bagong Taon, Nanawagan ang Department of Health – Metro Manila Center for Health Development sa publiko na suportahan ang Ligtas Christmas 2025 campaign.

Ang kampanya ay nakatuon sa pag-iwas sa mga masasamang gawi o “bad habits” kapag holiday season.

Ayon kay DOH-MMCHD Regional Director Lester M. Tan, kabilang sa mga bad habits na dapat iwasan ang mga sumusunod:

– sobra-sobrang pagkain ng (4Ms) – matamis, maalat, mataba, at mamantika
– labis na pag-inom ng alak na nagdudulot ng road crash, away, at pinsala sa kalusugan
– paninigarilyo at vaping sa loob ng tahanan at pampublikong lugar na mapanganib lalo na sa mga bata at matatanda
– kulang sa pisikal na aktibidad dahil sa mahabang oras ng handaan, panonood, at paggamit ng gadgets
– puyat at kakulangan sa pahinga na nagpapahina sa resistensya ng katawan

Sa datos ng DOH-MMCHD Regional Epidemiology and Surveillance Section noong huling quarter ng taong 2024, umabot sa mahigit 50,000 adults sa Metro Manila ang na-risk assess na may hypertension; mahigit 16,000 adults ang may Type 2 Diabetes; mahigit 100,000 adults ang sobra ang timbang o obese; mahigit 37,000 ang binge drinkers; at mahigit 25,000 naman ang smokers. (DDC)