Tagumpay ng 4Ps graduates sa Las Piñas ipinagdiwang

Kinilala at ipinagdiwang ng Pamahalaang Lungsod ng Las Piñas ang mga nagsipagtapos na benepisyaryo ng Pantawid Pamilyang Pilipino Program o 4Ps na matagumpay na naabot ang self-sufficient level ng pamumuhay, sa ginanap na Pugay Tagumpay sa Las Piñas.

Dumalo sa selebrasyon sina Mr. Bienvenido Jr. V. Barbosa, Director III at Assistant Regional Director for Operations; Keren T. Jemina, DSWD NCR Area Coordinator; CSWDO Head Ms. Lowefe Romulo; CHO Head Dra. Julie Gonzalez; PESO Head Mr. Redante M. Garcia; mga kinatawan ng iba’t ibang departamento, at Brgy. Focal Persons ng 4Ps.

Umabot sa 550 graduates mula sa Las Piñas ang binigyang-pugay ngayong taon. Ang kanilang pagtatapos ay hindi lamang personal na tagumpay kundi tagumpay din ng komunidad. Ito ay nangangahulugan na ang isang benepisyaryo ay nakaahon at may kakayahan nang paunlarin ang sarili at kanyang pamilya.

Tuloy-tuloy ang suporta ng Pamahalaang Lungsod ng Las Piñas sa mga programang nagbibigay ng oportunidad, direksyon, at pag-asa sa bawat pamilya upang makamit ang mas matatag at mas magandang kinabukasan. (Bhelle Gamboa)