7 biktima ng human trafficking sa Myanmar nakauwi na ng bansa

Pitong Pinoy pa na nabiktima ng human trafficking at pinagtrabaho sa scam hubs sa Myanmar ang nakauwi na sa bansa.

Ayon sa Bureau of Immigration, mula Myanmar ay dinala ang mga Pinoy sa Bangkok, Thailand at saka sila ibinyahe pauwi ng Pilipinas.

Sinabi ng BI na umano ang anim sa kanila na umalis sila sa bansa sa pamamagitan ng illegal migration corridor o ‘backdoor’ habang ang isa pa ay nagpanggap naman na turista.

Isa sa mga biktima ang nagkwento na sa pamamagitan ng job advertisement sa Facebook group ay inalok siya na magtrabaho bilang encoder sa Thailand at pinaalis siya sa pamamagitan ng pagsakay sa bangka mula Tawi-Tawi patungong Malaysia.

Galing Malaysia dinala siya sa Thailand at kalaunan sa Myanmar kung saan pinagtrabaho siya sa scam hub ng labinganim na oras kada araw.

Paalala ni BI Commissioner Joel Anthony Viado sa mga nais magtrabaho sa ibang bansa, huwag basta-basta maniniwala sa alok na mataas na sweldo lalo na kung kahina-hinala ang travel arrangements. (Dona Dominguez)