Paghahanda at koordinasyon sa sakuna mas pinatibay ng Las Piñas LGU
Mas pinagtibay ang kahandaan at koordinasyon ng mga frontliners sa kaligtasan ng komunidad sa ginanap na 3rd Fire & Rescue Exercises (FIREX) 2025 sa Las Piñas City.
Dinaluhan ito ng City Disaster Risk Reduction Management Office (CDRRMO), Bureau of Fire Protection (BFP), Philippine National Police (PNP), at Barangay DRRM teams.
Sa pamamagitan ng simulation ng fire rescue, sinubok ang bilis, taktika, at tamang koordinasyon ng mga kaisang ahensiya sa pagresponde sa panahon ng emergencies. Layunin ng aktibidad na mas mapahusay ang kanilang kakayahan sa pagligtas ng buhay at pagprotekta sa mga pasilidad at residente sa oras ng sunog.
Nagpunta rin sa kaganapan sina FCInsp Demetrio Sablan Jr., Chief Operation ng Fire District 1; FSupt Gerard Venezuela at FInsp Alex Alabastro bilang evaluators mula sa RHQ kasama sina FSInsp Peter Segunto, Chief Operation ng Fire District V at iba pang Chief Operations na nagsilbing evaluators mula sa iba’t ibang lungsod tulad ng Taguig, Malabon, San Juan, at Muntinlupa.
Napakahalaga ng ganitong mga pagsasanay dahil nagbibigay ito ng pagkakataon sa mga responders na mahasa ang kanilang skills, pagbutihin ang communication, at palakasin ang teamwork sa high-pressure situations. Ang mga innovations sa kanilang protocols at koordinasyon ay patunay ng kanilang pangako na gawing mas ligtas, mas epektibo, at mas handa ang mga custodial facilities at komunidad sa harap ng anumang sakuna.
Ang FIREX 2025 ay isa pang hakbang sa patuloy na pagbuo ng culture of preparedness sa Las Piñas kung saan ang kaligtasan ng bawat residente ay pangunahing prayoridad. (Bhelle Gamboa)
