Babaeng Corrections Technical Officer nakumpiskahan ng ‘shabu’ sa pandesal
Ipinag-utos ni Bureau of Corrections (BuCor) Director General Gregorio Pio P. Catapang Jr. ang preventive suspension laban sa babaeng Corrections Technical Officer matapos na mahulihan ng umano’y ilegal na droga.
Kinilala ni Catapang ang inarestong officer na si CTO1 Melchora Wong na nakuhanan ng dalawang pakete na naglalaman ng shabu na nakahalo sa loob ng pouch ng pandesal.
Si Wong ay hinuli ni CO1 Benito Pancho sa kasagsagan ng routine inspection sa New Bilibid Prison Gate 1, Maximum Security Compound bandang alas- 7:30 ng umaga.
Sa gitna ng isinagawang follow-up operation sa pangunguna ni Camp Commander NBP – Maximum Security Camp Commander, Maj. Henry Avila,nakumpiska ang 33 na plastic sachets na naglalaman ng umano’y shabu mula kay PDL Reineill T. Dizon sa Dorm 5A. Ayon pa sa ulat, si Dizon ay madalas dalawin ni Wong sa ospital.
Inutos din ni Catapang na sampahan agad ng kaukulang kaso laban kay Wong.Habang binigyan naman ng spot promotion si CO1 Pancho patungong sumunod na higher rank kung saan nakatakda siyang parangalan sa flag raising ceremony sa darating na Lunes.
“These are the challenges that we have to face. We are not only guarding persons deprived of liberty but we also have to be vigilant against our own people. Mabuti na lang mangilan ngilan lang yang mga matitigas ang ulo na ayaw pang magbago but their days are numbered,” sabi ni Catapang.
Aniya ang ganitong insidente ay isang halimbawa ng pagpapakita ng BuCor personnel sa paggawa ng mabuti at gagantimpalaan, at kung magpapatuloy ng lumang gawi ay tiyak na mahuhuli.
Muling nanawagan si Catapang sa lahat ng Corrections Officers na nagmsmando sa Bucor’s entry points upang mas alerto at mapanuri at higit sa lahat ay sumusunod sa istriktong implementasyon ng mga protocols. (Bhelle Gamboa)
