Year-End Job Fair 2025 isinagawa ng Las Piñas LGU

Patuloy ang pagtutok ng Pamahalaang Lungsod sa pagbibigay ng magagandang oportunidad para sa bawat Las Piñero sa pamamagitan ng isinagawang Year-End Job Fair 2025 na ginanap sa Robinsons Las Piñas.

Dinaluhan ito ni Mayor April Aguilar kasama si Public Employment Service Office (PESO)-Las Piñas Chief Red Garcia at DOLE MUNTAPARLAS Director Jeremiah Carlos, upang personal na suportahan ang mga naghahanap ng trabaho at siguruhing maayos ang proseso ng aplikasyon.

Umabot sa 351 jobseekers ang nagrehistro sa job fair. Sa tulong ng mga employer at government partners ay nasa 64 jobseekers ang Hired-On-The-Spot.

Nabatid na 25 employers ang lumahok sa year-end job fair ng lungsod kabilang ang BJMP na nag-alok ng 2,000 job vacancies nationwide para sa mga interesadong aplikante. Nakibahagi rin ang OWWA na tumugon naman sa concerns ng mga OFW at kanilang pamilya.

Layunin ng Year-End Job Fair 2025 na mag-alok ng mas maraming oportunidad sa mga Las Piñero upang magkaroon sila ng mas matatag at maginhawang kabuhayan para na rin sa kanilang pamilya. (Bhelle Gamboa)