Halos 50 pang LPCMTC skills training graduates tumanggap ng libreng kasangkapan at kagamitang pangkabuhayan mula sa Las Piñas LGU
Masayang inihandog ng Las Piñas City Local Government at Las Piñas City Manpower Training Center ang ikalimang batch ng mga tools at equipments na pangkabuhayan para sa halos 50 LPCMTC skills training graduates.
Pinangunahan nina Mayor April Aguilar at Engr. Noel L. Cuevas, LPCMTC Training Administrator, ang pagkakaloob ng iba’t ibang livelihood tools sa mga awardees upang bigyang oportunidad na makapagsimula sila ng sariling negosyo o makapasok sa trabaho ng may dunong at kumpiyansa sa sarili.
Inaasahang magagamit ng husto ng mga nasabing graduates ang kanilang mga natutunan mula sa mga kursong kanilang kinuha tulad ng Automotive, Bread and Pastry, Cookery, Electrical Installation and Maintenance, Food and Beverage, Hairdressing, Massage Therapy, Motorcycle Small Engine, Refrigeration and Air-Conditioning, at SMAW o iyong mga kursong may mataas na demand sa trabaho at negosyo ngayon.
Para sa lokal na pamahalaan, bawat kasangkapan at equipment ay hindi basta kagamitan lamang kundi simbolo rin ng pag-asa, pagkakataon, at bagong simula para sa bawat pamilyang Las Piñero. Layunin nitong tulungan ang mga graduates na maging self-reliant, magkaroon ng sariling kita, at tuluyang maiangat ang kalidad ng kanilang pamumuhay.
Sa pagpapatuloy ng programang ito, nananatili ang pangako ng lungsod na walang maiiwan dahil sa Las Piñas, ang bawat residenteng nagsisikap ay may katuwang na suporta mula sa pamahalaan. (Bhelle Gamboa)
