Higanteng Christmas Tree ng EMBO pinailawan ng Taguig LGU

Pinangunahan ni Mayor Lani Cayetano ang pagpapailaw sa makulay at mala-higanteng Christmas Tree sa loob ng Taguig People’s Park, Gate 1 J.P. Rizal Extension, Barangay West Rembo sa Taguig City.

Ayon kay Mayor Lani na ang araw na ito ay mahalaga sa bawat residente at naging bahagi sa buhay ng maraming residente ng EMBO.

Ipinaabot ng alkalde sa mga kababayan nito sa EMBO na parte ng kapaskuhan ang maghatid ng kasiyahan sa pamamagitan ng mga makukulay na palamuti at attraction kung saan iba’t ibang aktibidad ang inihanda ng lokal na pamahalaan para sa mga mamamayan ng lungsod.

Inihayag pa ni Mayor Lani na tanyag sa buong mundo na sa Pilipinas ang Pasko ay pinakamakulay, pinakamahaba, pinakamasaya ang pagdiriwang ng Pasko.Sa katunayan aniya pumapatak pa lamang sa unang ber month ay nagdiriwang na tayo ng Pasko, inaalala na natin ang Pasko, at nagbabatian na tayo ng Christmas.

Naniniwala ang alkalde na ang kapaskuhan ay maghahatid sa atin ng ibayong pag-asa at marami ang pagpapala at huwag kalilimutan ang tunay na diwa nito kung saan natanggap natin ang pinakamainam na regalo ng Panginoon nang ibigay Niya ang kanyang bugtong na anak.

Binigyang-diin ni Mayor Lani na ang mahalagang pagtitipong ito ay sa ngalan ng pag-ibig para sa mithiing Transformative, Lively, and Caring City.

“Mas pinaganda natin ang parke para sa mga residente ng EMBO at ibinukas po natin sa publiko.Yakapin po ninyo at alagaan ang parkeng ito. Ang commitment ng LGU kung ano ang ating nadatnan ay lalo pa nating pagandahin at mapatingkad para sa kaligayahan ng mga kababayang Taguigeño,” sabi ni Mayor Lani.

Kamakailan unang inilunsad ng LGU ang pamamahagi ng mga Pamaskong Handog nito para sa mga residente sa kani-kanilang tirahan. (Bhelle Gamboa)