2 barko ng China namataan ng PCG sa West PH Sea

Binuntutan ng barko ng Philippine Coast Guard ang dalawang barko ng China na namataan sa West Philippine Sea.

Ayon kay Coast Guard spokesperson Commodore Jay Tarriela, sa isinagawang routine maritime patrol ng BRP Cabra magkasunod na namataan ang dalawang China Coast Guard sa Silangan ng Bajo de Masinloc at sa bahagi ng Palauig, Zambales.

Kahit ‘di hamak na mas maliit ang barko ng PCG, inisyuhan ng radio challenge ang dalawang barko ng China at inutusang umalis sa katubigang sakop ng Pilipinas.

Binanggit ng PCG na ang pananatili sa lugar ng dalawang barko ng China ay paglabag sa Philippine Maritime Zones Act, United Nations Convention on the Law of the Sea at sa 2016 ruling ng Permanent Court of Arbitration.

Tiniyak naman ng PCG na patuloy ang gagawin nitong routine at lehitimong pagpapatrulya sa sa West Philippine Sea para maisulong ang soberanya ng bansa at mapigilan ang labag sa batas na presensya ng China sa lugar. (DDC)