Higit 30 bungo ng buwaya nakumpiska sa dayuhang pasahero sa NAIA

Hinarang ng mga otoridad sa Ninoy Aquino International Airport Terminal 1 ang isang American national matapos makita sa kaniyang bagahe ang mga bungo ng buwaya.

Sa isinagawang operasyon ng Bureau of Customs at mga tauhan ng ng Wildlife Traffic Monitoring Unit ng DENR – NCR, mahigit tatlumpung bungo ng American Alligator ang dala-dala ng dayuhan sa bagahe nito.

Ayon sa pasahero, ipangreregalo niya ang mga bungo sa isang event na kaniyang dadaluhan dito sa Pilipinas.

Nang isagawa ang inspeksyon, natuklasan na ang mga ito ay walang anumang kaukulang Import Permit mula sa DENR.

Paalala ng DENR sa publiko, maging maingat at responsable sa pag-angkat o pagdadala ng wildlife products at dapat tiyaking valid at kumpleto ang mga dokumento at permit upang maiwasan ang paglabag sa Republic Act No. 9147 o ang Wildlife Resources Conservation and Protection Act of 2001. (DDC)