DSWD patuloy ang kalinga sa mga pamilyang evacuees sa Cebu

Mula sa mga paaralang nagsilbing pansamantalang tahanan hanggang sa mga simbahan na naging kanlungan ng bawat pamilyang binagyo ng #TinoPH sa Cebu, nananatiling nakaagapay ang DSWD Field Office (FO) 7 – Central Visayas sa patuloy na paghahatid ng relief essentials para sa kanila.

Nitong Martes (Nobyembre 18), pinangunahan ng DSWD FO-7 ang pamamahagi ng mga hygiene kits sa tatlong evacuation sites sa lalawigan. Sa Balamban, umabot sa 128 hygiene kits ang naipamahagi sa mga pamilyang nanunuluyan sa Cebu Technological University at Cebu Normal University. Samantala, 47 hygiene kits naman ang naipagkaloob sa mga pamilyang pansamantalang naninirahan sa Cambubho Covered Court sa Danao City.

Ang simultaneous distribution na ito ay patunay ng matatag na dedikasyon ng DSWD sa mabilis at tuluy-tuloy na pagtugon para sa mga pamilyang patuloy na bumabangon mula sa iniwang pinsala ng kalamidad, alinsunod sa atas ni Pangulong Ferdinand R. Marcos Jr. (Bhelle Gamboa)