BuCor umayuda sa mga biktima ng Bagyong Uwan sa Muntinlupa City
Pinangunahan ni Bureau of Corrections Director General Gregorio Pio P. Catapang Jr. ang paghahatid ng donasyong tulong ng ahensiya para sa mga biktima ng bagyong Uwan sa lungsod.
Ang mga donasyong ito ay personal na ipinaabot ng mga opisyal at empleyado ng BuCor kay Caridad G. Molo, Assistant Department Head 2 ng Social Services Department ng Muntinlupa City.
Layunin nitong tulungan at asistehan ang mga biktima ng Bagyong Uwan lalo ngayong kinakailangan ang malasakit at pagkakaisa sa panahon ng matinding hamon sa buhay.
Sa halip na ipagdiwang ng magarbo ng ahensiya ang anibersaryo nito, pinili ni Catapang na ilaan ang okasyong ito sa pagsisiyasat sa sarili,panalangin, at pagpapatibay ng kanilang pananagutan bilang lingkod bayan.Binigyang-diin nito na mahalaga sa mga lingkod bayan na ipadama ang pakikiramay at pagmamalasakit lalo na sa tuwing nahaharap ang bansa sa mahihirap na sitwasyon.
Inanunsyo rin ni Catapang na natanggap na ng mga kuwalipikadong opisyal at empleyado ng BuCor sa bansa ang kanilang anniversary bonuses na tig-P3,000 bawat isa.
Ang bonus na ito ay ipinagkaloob sa ilalim ng Administrative Order No. 263 na naitatag noong 1996 ni Ruben D. Torres,na nagpapahintulot sa national government agencies, Government-Owned and Controlled Corporations, at Government Financial Institutions na magkaloob ng anniversary bonus.
Ipinagmamalaki ng BuCor ang pagsunod sa tradisyong ito at ang makabuluhang pagdiriwang ng mga anibersaryo habang tinitiyak ang gawang kabutihan at serbisyo na nananatiling pangunahin sa kanilang misyon. (Bhelle Gamboa)
