Bayanihan sa Estero: Malinis na Estero, Pamayanan Protektado
Patuloy ang sama-samang aksyon sa Las Piñas para sa ligtas at maayos na komunidad matapos ilunsad ngayong araw, Nobyembre 13, ang Bayanihan sa Estero Program sa Tartar Creek ng Barangay Pamplona Tres at Talon Dos.
Ang operasyon ay bahagi ng Oplan Kontra Baha na inilunsad ni Pangulong Ferdinand Marcos Jr., na layuning linisin at tanggalin ang polusyon sa mga estero at daluyan ng tubig upang mapabuti ang daloy ng tubig at mapalaki ang kapasidad ng mga ito.
Isinagawa ang flood control at dredging operations upang alisin ang makapal na putik, basura, at iba pang sagabal sa estero — mga mahahalagang hakbang upang mabawasan ang pagbaha lalo na ngayong madalas ang matitinding pag-ulan. Samu’t saring basura tulad ng plastic, kahoy, kawayan, bote, at mga naputol na sanga ng puno ang nahakot ng mga kawani ng MMDA, katuwang ang mga TUPAD beneficiaries.
Dumalo sina Mayor April Aguilar, Cong. Mark Anthony Santos, MMDA Chairman Romando Artes, at mga opisyal mula sa MMDA Flood Control Office bilang pagpapakita ng kanilang buong suporta sa paglilinis at rehabilitasyon ng estero.
Nagpamahagi rin ang MMDA ng lily pots at charcoal briquettes na gawa mula sa water hyacinths na naproseso sa kanilang water hyacinth facility — isang paraan para i-recycle ang mga nakolektang halaman at makatulong sa kabuhayan ng mga komunidad.
Naging posible ang operasyon sa tulong ng pinagsamang puwersa ng Las Piñas LGU, MMDA, DOLE-TUPAD, at DENR.
Buong suporta ang ibinibigay ni Mayor April Aguilar sa mga ganitong inisyatibo na naglalayong maghanap ng epektibong solusyon upang mapagaan, mabawasan, o tuluyang maiwasan ang pagbaha sa Lungsod ng Las Piñas. (Bhelle Gamboa)
