Naga-Legazpi PNR Route suspendido; dagdag PUVs iniutos ng DOTr

Inatasan ng Department of Transportation ang Land Transportation Franchising and Regulatory Board na magtatalaga ng karagdagang pampasaherong sasakyan para sa mga pasaherong maaapektuhan ng suspendidong biyahe ng PNR Naga-Legazpi.

Kasunod ito ng pagkawasak ng PNR Bridge na nag-uugnay sa San Rafael at Maipon sa Guinabatan, Albay dahil sa pananalasa ng Super Bagyong ‘Uwan’.

Ayon kay Acting Transportation Secretary Giovanni Lopez, nagsasagawa na ng pagsusuri at inspeksyon ang PNR sa nasabing tulay upang matukoy ang lawak ng pinsala.

Pinasusuri din ni Lopez sa PNR ang buong Bicol commuter train route upang masiguro na walang iba pang naapektuhan ng bagyo.

Pinapayuhan ang publiko na iwasan muna ang paglapit o pagpunta sa apektadong lugar at maghintay sa mga opisyal na abiso mula sa PNR at DOTr hinggil sa kalagayan ng linya at muling pagbabalik ng operasyon. (DDC)