Proseso ng implementasyon ng NCAP at paggamit ng body-worn cameras ng traffic enforcers ipinakita g MMDA kay Sen. Raffy Tulfo

Ininspeksiyon nina Metropolitan Manila Development Authority Chairman Atty. Don Artes at Senador Raffy Tulfo ang MMDA Communications and Command Center sa punong tanggapan ng ahensiya sa Pasig City upang maipakita sa mambabatas ang proseso ng implementasyon ng No Contact Apprehension Policy (NCAP) at paggamit ng body-worn cameras ng mga traffic enforcer.

Ipinirisinta ni Atty. Artes ang real-time traffic monitoring system at ang paggamit ng mga body-worn cameras ng Swift Traffic Action Group (STAG) enforcers na pinapangunahan ni Edison “Bong” Nebrija.

Ayon kay Artes, nananatiling pangunahing layunin ng ahensiya ang modernisasyon ng traffic enforcement upang patas, maayos, at ligtas ang operasyon para sa mga motorista at traffic enforcers.

“Kahit yung mga body-cam natin, ginagamit na natin sa panghuhuli para wala nang masyadong interaction, wala nang pagtatalo,” dagdag ni Chairman Artes.

Binigyang-diin naman ni Senator Tulfo na ang kaniyang pagbisita ay bahagi ng kaniyang pagsusulong ng pagkakaloob ng hazard pay at regularisasyon para sa mga enforcers at street sweepers sa MMDA.

Layunin ng MMDA na ipagpatuloy ang paggamit ng makabagong teknolohiya at pagsuporta sa kapakanan ng mga kawani habang isinusulong ang mas maayos at ligtas na daloy ng trapiko at pampublikong serbisyo sa Metro Manila. (Bhelle Gamboa)