MMC meeting sumentro sa pagtugon sa baha at kaunlaran ng Metro Manila

Dumalo kahapon si Las Piñas City Mayor April Aguilar sa Metro Manila Council (MMC) meeting kasama sina MMDA Chairman Atty. Don Artes, Department of Public Works and Highways (DPWH) Secretary Vince Dizon at iba pang mga alkalde sa Metro Manila.

Sa naturang pulong, tinalakay ang direktiba ng Pangulo na linisin ang mga daluyan ng tubig at paigtingin ang mga hakbang laban sa pagbaha sa buong Metro Manila. Sa harap ng mga lumalalang problema sa urban flooding, binigyang-diin ng mga opisyal ang kahalagahan ng mas mahigpit na koordinasyon sa pagitan ng mga lokal na pamahalaan, DPWH, at MMDA upang mapabilis ang mga proyekto sa paglilinis at dredging ng mga ilog at estero.

Kabilang din sa mga natalakay ang suporta ng MMC sa Paleng-QR PH Plus Program ng Department of the Interior and Local Government (DILG) at Bangko Sentral ng Pilipinas (BSP), na layuning palawakin ang paggamit ng digital payment systems sa mga pamilihan.

Pinag-usapan din ang adoption ng Infrastructure Audit (IA) Manual ng DILG upang mapahusay ang pagsubaybay sa kondisyon ng mga imprastraktura, pati na rin ang Waste-to-Energy (WTE) projects ng Department of Energy (DOE) na nakikitang solusyon sa mga problema sa solid waste management at pagbaha.

Bilang kinatawan ng Lungsod ng Las Piñas, tiniyak ni Mayor April ang patuloy na pakikiisa ng siyudad sa mga inisyatibang pangrehiyon na naglalayong magbigay ng ligtas, maayos, at maunlad na pamumuhay sa bawat mamamayan. (Bhelle Gamboa)