Lokal na produkto bumida sa Mercato ng MMDA

Binuksan sa publiko ang Mercato ng Metropolitan Manila Development Authority (MMDA) na nagsusulong na ipakilala ang iba’t ibang lokal na produkto bilang bahagi sa pagdiriwang ng kanyang ika-50 anibersaryo ng pagkakatatag ng ahensiya.

Hinihikayat ng MMDA ang publiko na mag-shopping at suportahan ang lokal na produkto sa Mercato na nagtatampok ng sari-saring produkto mula sa Kadiwa ng Pangulong Ferdinand Marcos Jr. ng Department of Agriculture (DA) at mga lokal na pamahalaan ng Muntinlupa, Navotas, Quezon, Pasig, Valenzuela, at Malabon.

Kabilang dito ang sariwang mga gulay, bigas, seafoods, leather goods, condiments, dried goods, suman, chichirya, mga abubot, at iba pang pangangailangan na mabibili rito sa abot-kayang presyo.

Pinangunahan ni MMDA Chairman Atty. Don Artes ang ribbon cutting ceremony ng pagbubukas ng Mercato na matatagpuan sa harapan ng MMDA Head Office sa Julia Vargas corner Molave Street, Brgy. Ugong, Pasig City.

Nagpasalamat si Chairman Artes sa mga lokal na pamahalaan na nakilahok sa selebrasyon ng 50 anibersaryo ng ahensiya na siksik ng mga aktibidad para sa mga kawani nito.

Nagpahayag naman ng pagbati at suporta si Valenzuela City Mayor Wes Gatchalian sa selebrasyon ng MMDA. Nagagalak ang alkalde sa pagiging bahagi ng Valenzuela sa isinasagawang Mercato na tiyak na makatutulong sa pamilya ng kawani at ng publiko.

Ayon sa MMDA ang Mercato ay tatagal hanggang Biyernes ng hapon. (Bhelle Gamboa)