3 weather systems magpapaulan sa malaking bahagi ng bansa sa paggunita ng Undas

Magiging maulan sa malaking bahagi ng bansa sa paggunita ng Undas dahil sa pag-iral ng tatlong weather systems.

Sa special weather outlook na inilabas ng PAGASA para sa UNDAS 2025, simula Huwebes, Oct. 30 hanggang Biyernes, Oct. 31 ang northeast monsoon o amihan ay maghahatid ng maulap na papawirin sa Batanes at sa Babuyan Islands habang bahagyang maulap hanggang sa maulap na papawirin naman na may isolated na mahinang pag-ulan ang mararanasan sa Apayao, Abra at Ilocos Norte.

Ang LPA naman na nasa Silangan ng Visayas at ang ITCZ ay magdudulot ng maulap na papawirin na may kalat-kalat na pag-ulan at thunderstorms sa Visayas, Mindanao, Metro Manila, CALABARZON, MIMAROPA, Central Luzon, nalalabing bahagi ng Cagayan Valley, La Union, at Pangasinan.

Sa Sabado, Nov. 1, patuloy na magdudulot ng maulap na papawirin na may kalat-kalat na pag-ulan ang LPA at ITCZ sa Visayas, Metro Manila, CALABARZON, MIMAROPA, Bicol Region, Aurora, at Zamboanga Peninsula.

At sa Linggo naman, Nov. 2, ang MIMAROPA, CALABARZON, Bicol Region, at Western Visayas ay patuloy na makararanas ng maulap na papawirin na may kalat-kalat na pag-ulan dahil pa rin sa LPA at ITCZ. Habang amihan naman ang magdudulot ng pag-ulan sa Cagayan Valley, Cordillera Administrative Region at Aurora. (DDC)