Mayor ng Cabuyao pinatawan ng disqualification ng Comelec

Pinatawan ng disqualification ng Commission on Elections 1st Division si Cabuyao, Laguna Mayor Dennis Hain dahil sa umano ay pagkakasangkot sa vote-buying noong nagdaang midterm elections.

Ang kaso laban kay Hain ay isinampa sa Comelec ni dating Cabuyao vice mayor Leif Opiña kung saan tinukoy nito na namahagi umano ang alkalde ng pera sa idinaos na “Poll Watchers Seminar.”

Sa resolusyon ng Comelec, binigyang-bigat nito ang mga larawan at video na isinumite ni Opiña bilang ebidensya kung saan makikita ang mga taong nakapila para tumanggap ng 1,000 pesos at sample ballot.

Sinabi ng Comelec na hindi rin itinanggi ni Hain ang alegasyon na nagkaroon nga ng pagtitipon sa compound na kaniyang pag-aari at na siya ay present sa oras na nangyari ang sinasabing pamamahagi ng pera.

Ayon sa Comelec, maituturing itong “pag-amin” sa panig ng mayor na may nalalaman siya sa aktibidad. (DDC)