Mas mabilis pa ang pagtaas ng presyo ng langis kaysa sa pagpapanagot sa mga kurakot – BAYAN

Binatikos ng grupong Bagong Alyansang Makabayan ang Marcos administration sa kabiguang protektahan ang sambayanan sa pagtaas ng presyo ng bilihin lalo na ang oil products.

Ayon sa BAYAN, mas mabilis pa ang pagtaas ng presyo ng langis kaysa sa pagkamit ng hustisya laban sa mga kurakot.

Habang labis ang epekto sa mga Pilipino ng problema sa ekonomiya ng bansa, hinahayaan naman umano ng pamahalaan ang mga kurap na opisyal ng gobyerno na patuloy na makatakas sa pananagutan.

Sinabi ng grupo na sa halip na dagdagan ang pasanin ng taumbayan ay dapat pursigihin ng gobyerno na mapanagot ang mga sangkot sa pagnanakaw sa kaban ng bayan.

Ayon sa BAYAN, itim na Pasko ang naghihintay sa mga mamamayan na hindi tiyak kung may maihahain man lang silang pagkain sa kanilang lamesa. (DDC)