Muntinlupa handa na sa Undas

Puspusan ang paghahanda ng Pamahalaang Lungsod ng Muntinlupa para sa Undas 2025. Layunin nitong masiguro ang maayos, malinis, at ligtas na pagdalaw ng mga residente sa mga sementeryo at memorial parks ngayong panahon ng paggunita.

Sa utos ni Mayor Ruffy Biazon, na-activate na ang Task Force Undas na binubuo ng iba’t ibang departamento para tumutok sa crowd control, medical assistance, traffic rerouting, at pagbibigay ng impormasyon sa publiko.

Nagsimula na rin ang mga pre-Undas operations. Nag-flushing ang Bureau of Fire Protection (BFP) sa mga pangunahing daanan at paligid ng mga sementeryo. Naglunsad ng clean-up drive ang Community Affairs and Development Office (CADO) at Environmental Sanitation Center (ESC) para alisin ang mga sagabal sa daanan. Kasabay nito, nagsagawa ng pagpipintura at pagkukumpuni ang Engineering Department sa mga pampublikong pasilidad.

Ang Libingan Panlungsod ng Muntinlupa ay bukas mula Oktubre 31 hanggang Nobyembre 2, sa ganap na alas-6:00 ng umaga hanggang 10:00 ng gabi. Pinapayagan ang paglilinis at pagpipintura ng puntod hanggang Oktubre 28, habang walang schedule ng libing o cremation mula Oktubre 31 hanggang Nobyembre 2. Paalala rin na tanging fully vaccinated visitors lamang ang papayagang makapasok.

Para sa kaayusan, mahigpit na ipinagbabawal ang pagsusugal, pagdadala ng alak at matutulis na bagay, videoke o malalakas na sound system, pagtitinda sa loob o labas ng sementeryo, at pagparada ng sasakyan sa loob ng lugar.

Magkakaroon ng mga tauhan sa bawat sementeryo para tumulong sa crowd control, medical response, traffic management, at pagbibigay ng impormasyon sa publiko.

Inaanyayahan ang lahat na makiisa sa mga patakaran para sa mapayapa at maayos na Undas. Para sa karagdagang updates, bisitahin ang opisyal na social media pages ng Pamahalaang Lungsod ng Muntinlupa at ni Mayor Ruffy Biazon. (Bhelle Gamboa)