Las Piñas nasungkit ang grand award sa 2025 Metro Manila SubayBAYANI Awards

Itinanghal ang Las Piñas City sa ilalim ng liderato ni Mayor April Aguilar, bilang Grand Awardee sa 2025 Metro Manila SubayBAYANI Awards, kasama ang mga lungsod ng Parañaque at Pasig, na ginanap sa Manila Hotel.

Inorganisa ng Department of the Interior and Local Government–National Capital Region (DILG-NCR), ang SubayBAYANI Awards ay kumikilala sa mga local government units sa pagpapakita ng kanilang napakahusay na halimbawa, inobasyon, at pananagutan sa pamamahala sa lokal na imprastraktura.

Ang pagkilalang ito sa Las Pinas City ay nagpapatunay sa pangako nitong transparent, mabisa, at nakatuon sa komunidad na implementasyon ng mga proyektong imprastraktura na nag-aangat sa pamumuhay ng mga residente nito at isulong ang sustenableng pag-unlad ng lungsod.

Kasama ni Mayor Aguilar sa seremonya sina Acting City Engineer Michael Aguilar, City Planning Officer Engr. Leonida Lagrisola, CENRO Head Engr. Cezar Perillo, LGU LGSF Focal Persons Engr. Bernadette Dela Cruz at Engr. Joseph Acebuche, at DILG Las Piñas Director John Patrick Megia.

Binigyang-diin ng SubayBAYANI Grand Award ang hindi natitinag na husay ng Las Piñas sa pamamahala ng imprastraktura at ang progresibong pamamalakad na sumasalamin sa pangako ni Mayor Aguilar na serbisyo, inobasyon, at pananagutan para sa bawat Las Piñero. (Bhelle Gamboa)