DOLE inihahanda na ang pagbibigay ng emergency jobs sa halos 6K naapektuhan ng Typhoon Nando

Magkakaloob ang Department of Labor and Employment 32 million pesos na halaga ng emergency employment assistance sa halos anim na libong residente ng Cagayan at Batanes na naapektuhan ng Typhoon Nando.

Sa pamamagitan ng Tulong Panghanapbuhay sa Ating Disadvantaged Workers o TUPAD program, 5,750 beneficiaries mula sa labingtatlong coastal towns sa Cagayan at anim na munisipalidad sa Batanes ang bibigyan ng hanapbuhay.

Sa ilalim ng TUPAD program, ang mga apektadong residente ay sasailalim sa 15 days short-term community work gaya ng pagsasagawa ng clearing operations, repair, at rehabilitation efforts ngayong buwan ng Oktubre.

Sa pamamagitan nito ay magkakaroon ng pagkakakitaan ang mga naapektuhang residente.

Tiniyak ni DOLE Regional Director Jesus Elpidio Atal Jr. na ang pinakaapektadong mga pamilya ang mapagkakalooban ng tulong. (DDC)