“Highest level” ng legal aid binibigay sa mga Pinoy na nakahanay sa death row sa ibang bansa – DMW

Tiniyak ng Department of Migrant Workers ang pagbibigay proteksyon sa dalawampu’t limang overseas Filipino workers na kasalukuyang nakahanay sa death row sa iba’t ibang mga bansa.

Ayon sa DMW, ang nasabing mga Pinoy ay nakatatanggap ng highest level ng legal at diplomatic attention mula sa gobyerno ng Pilipinas.

Nakikipagtulungan ang DMW sa Department of Foreign Affairs at sa Office of the President para masigurong lahat ng Pinoy na nahatulan ng parusang kamatayan ay nabibigyan ng due process, may access sa competent legal counsel, at may oportunidad sa clemency o sentence commutation.

Sinabi ni DMW Secretary Hans Leo Cacdac, mula sa 50 hanggang 60 OFW na nakahanay sa death row ay bumaba na ito sa 25 matapos magpatupad ng mga reporma sa Malaysia sa pagpapataw ng parusa sa mga lumalabag sa kanilang batas gayundin ang patuloy na diplomatic engagement ng ppamahalaan.

Maliban sa tulong legal, sinabi ng DMW na pinagkakalooban din ng psychological, moral, at financial assistance ang pamilya ng mga apektadong OFWs. (DDC)