3,000 pamilya ng OFWs pinagkalooban ng tulong matapos mabiktima ng pagbaha

Pinangunahan ni Pangulong Ferdinand R. Marcos Jr. ang pamamahagi ng Department of Migrant Workers – AKSYON Fund sa 3,000 pamilya ng mga overseas Filipino workers na biktima ng mga nakaraang pagbabaha.

Sa aktibidad na idinaos sa Brent Z. Guiao Stadium sa Pampanga, kasama ng pangulo sa pamamahagi ng tulong sina Migrant Workers Secretary Hans Leo J. Cacdac, Pampanga Governor Lilia Pineda, TESDA Secretary Jose Francisco Benitez, OWWA Administrator Patricia Yvonne Caunan, at mga lokal na opisyal ng lalawigan.

Pinagkalooban ng tig-P5,000 financial assistance sa bawat benepisaryong pamilya sa ilalim ng AKSYON Fund ng DMW.

Sinabi ng pangulo na magbibigay din ng dagdag na tig-P5,000 cash assistance mula sa kaniyang tanggapan bilang simbolo ng walang hanggang pasasalamat sa sakripisyo ng OFWs sa pagpapaunlad ng bansa. (DDC)