Taguig LGU nagpadala ng search and rescue team sa Cebu

Sumama ang Taguig City sa national relief efforts matapos ang dalawang kalamidad na tumama sa bansa —ang Bagyong Opong sa Masbate at 6.9-magnitude na lindol sa Cebu.

Kaninang umaga dinispatch ng Taguig ang kanyang Search and Rescue Team sa Cebu kasama ang iba pang local government units (LGUs) sa isang OCD-led mission upang umasiste sa mga apektadong komunidad.

Habang mabilis ang deployment na nakatuon sa Cebu, ipinahayag din ng Taguig ang pakikiisa nito sa Masbate sa matinding pinsalang dulot ng Bagyong Opong. Hiniling ni Mayor Lani Cayetano sa City Council na aprubahan ang alokasyon ng assistance para magpaabot ng tulong sa Cebu at Masbate.

Nabatid na ang mga Taguig rescuers ay pawang sertipikadong collapsed structure search and rescue (CSSR) team ng lungsod kung saan bihasa sa teknikal na mga larangan ng search and rescue procedures gaya ng high angle rescue, water search and rescue, technical extrication, rope management at iba pa.Dinala ng team ang mga kagamitang hydraulic combi tool, chipping gun, impact drill, portable grinder, at portable jack hammer magin kermantle ropes, carabiners, pulleys, ascenders, webbing, at harnesses. (Bhelle Gamboa)