1,699 pang PDLs pinalaya ng BuCor
Umabot sa kabuuang 1,699 pang persons deprived of liberty (PDLs) ang pinalaya ng Bureau of Corrections (BuCor) magmula Hulyo 31 hanggang Oktubre 1 ngayong taon kasama na rito ang 185 PDLs na dumalo sa culminating ceremony sa New Bilibid Prison Compound sa Muntinlupa City, Iwahig Prison and Penal Farm sa Puerto Princesa at Leyte Regional Prison.
Sinabi ni BuCor Director General Gregorio Pio P. Catapang Jr. na pinalaya ang nasabing PDLs sa mga sumusunod na dahilan:
* Acquittal – 202
* Cash bond – 2
* Granted probation – 41
* Habeas Corpus -35
* Parole – 130
* Expired maximum sentence – 1,289
Idinagdag pa ni Catapang na ang kaganapan ay hindi lamang selebrasyon ng natagpuang bagong kalayaan kundi ang pinagsama-samang hakbang ng BuCor at mga stakeholders upang tiyaking katanggap-tanggap at patas ang correctional process para bigyang-daan ang mas rehabilitasyong mga inisyatiba.
Nagsilbin namang panauhin pandangal si Sandiganbayan Associate Justice Gener M. Gito.“ Ako po ay naniniwala na ang lahat ng nagkasala sa batas at nakulong ay may pag asang bumangon sa kanilang pagkakamali. Hindi likas sa tao ang maging masama ang likas sa tao ay ang pagiging mabuti,” sabi ni Gito sa PDLs.
“Sa mga lalaya huwag ninyong hayaan na ang naging sintensya sa inyo ang syang maging kahulugan ng inyong pagkatao, huwag ninyong hayaan na ang dating pagka-kasala nyo ang maging kahulugan ng inyong natitirang buhay sa mundong ibababaw. Walang taong hindi nagkakamali, walang taong hindi nagkakasala. subalit maari tayong bumangon muli sa ating hindi magandang nakaraan,” diin pa ni Gito.
Ang mga lumayang PDLs ay mula sa limang pasilidad ng Correctional Institution for Women (CIW) – 97, CIW- Mindanao – 6, Davao Prison and Penal Farm – 194, Iwahig Prison and Penal Farm – 215, Leyte Regional Prison – 130, NBP -Maximum – 270, NBP-Medium – 218, NBP-Minimum – 209, NBP-Reception and Diagnostic Center (RDC) – 27, Sablayan Prison and Penal Farm – 180 at San Ramon Prison and Penal Farm – 153.
Dumalo rin sa aktibidad sina Justice Assistant Secretary Michelle Lapuz, Sergio Calizo, Jr., Chairperson, Board of Pardons and Parole, Atty. Ronald Macorol ng Public Attorney’s Office at Almarin Tillah, Al Haj, presidente ng Muslim Association of the Philippines (MAPI). (Bhelle Gamboa)
