Price freeze sa LPG, kerosene sa Cebu babantayan ng DOE

Tiniyak ng Department of Energy na imo-monitor nito ang pag-iral ng price freeze sa LPG at kerosene sa Cebu matapos ang pagtama doon ng magnitide 6.9 na lindol.

Ayon sa DOE, epektibo ang price freeze sa loob ng animnapung (60) araw kasunod na rin ng deklarasyon ng state of calamity sa lalawigan.

Sa pamamagitan ng pag-iral ng price freeze sinabi ng DOE na mapoprotektahan ang mga apektadong pamilya at matitiyak na magpapatuloy ang kanilang access sa essential fuels habang sumasailalim sila sa recovery period.

Siniguro naman ng DOE katuwang ang Department of Trade and Industry at local government units na istriktong babantayan ang mga retailers at distributors para maiwasan ang overpricing at profiteering.

Sa kabila ng pinsala ng malakas na lindol na tumama sa lalawigan, sinabi ni Energy Secretary Sharon Garin na sapat ang suplay ng produktong petrolyo sa lalawigan at nananatili ding uninterrupted ang distribution efforts. (DDC)